Mehefin 2022

Adran Chwaraeon

Braf yw gweld  pethau yn nesáu at normal. Bu’r disgyblion yn cymryd rhan mewn twrneimantau rygbi, pêl fasged, pêl-droed, hoci, a hefyd mewn cystadleuaeth athletau ar lefel De Gwynedd a Sirol. Rydym yn llongyfarch pawb fu’n cymryd rhan, ac yn arbennig Mia Roberts sydd wedi ei dewis i dîm athletau dan 17 Eryri. Bydd Mia yn cystadlu yn y 1500m yn rowndiau terfynol Cymru, fis nesaf.

Rydym yn dymuno yn dda i Nansi Ioi Roberts fydd yn cynrychioli tîm hoci Cymru dan 16 oddi cartref yn Belfast y mis yma.

Rydym hefyd yn falch o lwyddiant Effi Lois Jones sydd wedi cael ei dewis i dîm hoci dan 13 Gogledd Cymru - da iawn chdi.

Ganol y mis bu Hari Annwyl Roberts yn cynrychioli Cymru yn nhîm pêl-droed dan 15 yng Nghroasia. Chwaraeodd Hari ym mhob un o'r 4 gêm yn erbyn Bwlgaria, Bosnia a Herzegovina, Gogledd Macedonia ac Iwerddon.

Da iawn bob un ohonoch, mae’r ysgol a’r adran Addysg Gorfforol yn falch iawn ohonoch.

Adran Gerdd

Mae’r adran wedi bod yn brysur yn ymarfer ar gyfer Eisteddfod Genedlaethol yr Urdd a gynhelir yn Ninbych eleni. Rydym yn dymuno yn dda i’r disgyblion fydd y cynrychioli’r ysgol a chewch fwy o’u hanes yn y rhifyn nesaf. Os na fyddwch wedi clywed y partïon cerdd dant yn yr eisteddfod bydd cyfle i chi eu clywed yng nghyngerdd Gŵyl Cyhoeddi Eisteddfod Genedlaethol Llŷn ac Eifionydd yn Neuadd Dwyfor.

Adran Celf

Llongyfarchiadau i Dewi Griffith am ddod yn gyntaf yn y gystadleuaeth “dudalen gomig gyda chymeriad(au)” i ddisgyblion blwyddyn 7,8 a 9 yn Eisteddfod Celf Dylunio a Thechnoleg Rhanbarth Eryri. Da iawn chdi.

Gŵyl Gyhoeddi Eisteddfod Genedlaethol Llyn Ac Eifionydd

Mae disgyblion yr ysgol wrthi’n brysur yn paratoi clip fideo ar gyfer croesawu pawb i Ŵyl y Cyhoeddi. Rydym i gyd yn edrych ymlaen at gael gweld beth fydd y disgyblion wedi ei greu, cadwch olwg amdanyn nhw!